जिल्लाका माध्यमिक विद्यालयबिच वक्तृत्वकला प्रतियोगिता सम्पन्न

रविन विश्वकर्मा

“समृद्ध लुम्बिनी प्रदेशको ईच्छ, गुणस्तरीय एवंम रोजगारमुलक शिक्षा” शिर्षकमा अन्तर विद्यालय स्तरीय वक्तृत्वकला प्रतियोगिता सम्पन्न भएको छ । सामाजिक बिकास डिभिजन कार्यालय प्यूठानको आयोजना तथा साहित्य परिषद् प्यूठानको सह आयोजनामा जिल्लाका माध्यमिक विद्यालयबिच मंगलबार वक्तृत्वकला प्रतियोगिता सम्पन्न गरिएको हो । राष्ट्रिय शिक्षा दिवस एवम् संविधान दिवसको अवसरमा प्रतियोगिताको आयोजना गरिएको सामाजिक बिकास डिभिजन कार्यालय प्यूठानका प्रमुख पुण्य प्रसाद न्यौपालेले जानकारी दिए ।

झिमरुक बहुमुखी क्याम्पसको सभा हलमा सम्पन्न भएको प्रतियोगितामा प्रथम कालिका आवासिय मावि बिजुवारकी छात्रा सन्ध्या भण्डारी, द्वितीय सरस्वती मावि बाङ्गेशालकी छात्रा सावित्रा सुनार, तृतिय बेदविद्या आश्रम स्वर्गद्वारीका आयुष रिजाल र सान्त्वना सारदा मावि सापडाँडाका हिमाल सुनार भएका छन् । प्रतियोगिताका प्रथम, द्धितिय, तृतीय, र सान्तवना हुनेहरुलाई क्रमश नगद रु ७ हजार, ५ हजार, ४ हजार र ३ हजार पुरस्कारसंगै प्रमाणपत्र प्रदान गरिएकोे छ।
प्रतियोगितामा जिल्लाका २१ वटा माध्यमिक विद्यालयको सहभागिता रहेको थियो ।

प्रतियोगिताको निर्णायक मण्डलमा प्युठान क्याम्पस खलंगा प्युठानका क्याम्पस प्रमुख कल्पना खड्का, स्वर्गद्वारी बहुमुखी क्याम्पसका सहायक क्याम्पस प्रमुख रामकृष्ण शर्मा र शिक्षा विकास तथा समन्वय इकाइ प्युठानका पुर्व प्रमुख शिवराज पण्डित रहनुभएको थियो ।

सामाजिक बिकास डिभिजन कार्यालय प्यूठानका प्रमुख पुण्य प्रसाद न्यौपानेको अध्यक्षतामा भएको कार्यक्रममा जिल्ला समन्वय समितिका प्रमुख धरम बहादुर जिसिको प्रमुख आतिथ्यता रहेको थियो । कार्यक्रमको संञ्चालन साहित्य परिषद् प्युठानका कार्यवाहक अध्यक्ष बिमला खनालले गर्नुभएको थियो ।