उच्च पहाडी र हिमाली भेगमा हिमपातको सम्भावना आईतवार देखि मौसममा सुधार आउने

काठमाडौ -आज देशभर बादल लागेको छ । यसको प्रभावले पहाडी जिल्लाहरुमा पानी पर्ने सम्भावना रहेको मौसमविदहरुको भनाई छ । उच्च पहाडी र हिमाली भेगमा हिमपातको सम्भावना रहेको छ ।

पश्चिमी वायुको प्रभाव शुक्रबार रातिदेखि नै नेपालमा परेको छ । त्यसैले बादल लागेर राम्रोसँग घाम लागेको छैन । गत २४ घण्टायता गण्डकी प्रदेश र कोशी प्रदेशका एक–दुई स्थानमा पानी परिरहेको छ । सुदूरपश्चिमको डडेलधुरा तथा कैलालीका बचिला र बलिया केन्द्रमा फाटफुट वर्षा रेकर्ड भएको छ ।

आज सुदूरपश्चिम, कर्णाली, गण्डकी र कोशी प्रदेशका पहाडी जिल्लाका एक–दुई स्थानमा हल्का वर्षाको सम्भावना रहेको छ । यसैगरी उच्च पहाडी र हिमाली भेगमा हिमपातको सम्भावना रहेको छ ।

आइतबारदेखि भने मौसममा सुधार आउने छ । पहाडी भूभागमा भने बादल रहिरहने सम्भावना छ । आगामी विहीबारदेखि फेरि पश्चिमी वायुको प्रभाव पर्ने सम्भावना रहेको मौसमविदहरु बताउँछन् ।