चौरजहारिमा फाल्गुन २२ गत्ते देखि चौथो महोत्सव हुने

रुकुम पश्चिमको चौरजहारी नगरपालिकामा फाल्गुन तेस्रो सातादेखि सांस्कृतिक महोत्सव हुने भएको छ । स्थानीय सहिद स्मृति कला संस्कृति संरक्षण केन्द्रको आयोजनामा वडा नम्बर २ को सेवा केन्द्र स्थित रङ्गशालामा चौथो बृहत चौरजहारी कृषि, पर्यटन, व्यापार तथा सांस्कृतिक महोत्सव २०८१ हुने भएको हो ।

फाल्गुन २२ गतेदेखि सुरुहुने महोत्सव आगामी चैत्र ४ गतेसम्म सञ्चालन हुने मुसिकोटमा आयोजित पत्रकार सम्मेलन मार्फत जानकारी गराईएको हो ।
कला, संस्कृति, कृषि, उद्योग व्यापार, चौरजहारी नगरपालिका समृद्धिको आधार भन्ने नाराका साथ महोत्सव आयोजना गर्न लागिएको महोत्सवका निर्देशक एलबि कटुवालले जानकारी दिनुभयो ।

सहिद स्मृति कला संस्कृति संरक्षण मञ्चको संस्थागत विकासका लागि महोत्सव आयोजना गरिएको उहाँले बताउनुभयो ।

चौरजहारीमा पहिलो महोत्सव भव्य रूपमा सम्पन्न भएको तथा दोस्रो महोत्सव कोरोना महामारी र तेस्रो महोत्सव जाजरकोट भूकम्पका कारण प्रभावित भएकोमा यो पटक भव्य रूपमा संचालन गरिएको उहाँको भनाई छ ।

महोत्सवमा १ सय ३० वटासम्म व्यापारिक स्टलहरू रहने र स्थानीय व्यापारीलाई स्टलमा २० प्रतिशतसम्म छुट दिइने कटुवालले बताउनुभयो ।

त्यस्तै महोत्सवमा पल शाह लगायतका राष्ट्रिय तथा स्थानीय ख्याति प्राप्त कलाकारहरूको प्रस्तुति समेत रहने उहाँले जानकारी गराउनुभयो ।

होटेल शिरशिरको सभाहलमा संचालन गरिएको पत्रकार सम्मेलमा महोत्सव आयोजक समितिका संयोजक राजु जि.आरको अध्यक्षता रहेको कार्यक्रममा राष्ट्रिय लोक तथा दोहोरी गीत प्रतिष्ठानका अध्यक्ष तुल देवकोटाले संचालन गर्नुभएको थियो